ജൂണ് ഒന്നിന് തന്നെ പുതിയ അധ്യായന വര്ഷം ആരംഭിക്കുന്ന കാര്യം വിദ്യാഭ്യാസ വകുപ്പിന്റെ സജീവ പരിഗണനയില്. കോവിഡ് വ്യാപനം മൂലം സ്കൂളുകള് അടഞ്ഞു കിടക്കുന്നതിനാല് വിക്ടേഴ്സ്
ചാനല് വഴി ജൂണ് ഒന്നിന് തന്നെ വിദ്യാര്ഥികള്ക്ക് ക്ലാസുകള് ആരംഭിക്കാനാണ് ഉദ്ദേശിക്കുന്നത്. ഇത് സംബന്ധിച്ച് കൈറ്റ് സമര്പ്പിച്ച ശുപാര്ശകള്കൂടി പരിഗണിച്ചായിരിക്കും അന്തിമ തീരുമാനം. പുതുതായി ചുമതലയേറ്റ
പൊതുവിദ്യാഭ്യാസമന്ത്രി വി. ശിവന്കുട്ടി മുതിര്ന്ന ഉദ്യോഗസ്ഥരുമായി നടത്തിയ ചര്ച്ചയില് ഡിജിറ്റല് ക്ലാസുകളുടെ വിശദാംശങ്ങള് തേടി. കഴിഞ്ഞവര്ഷത്തെ ഡിജിറ്റല്/ ഓണ്ലൈന് ക്ലാസുകളുടെ ഫലപ്രാപ്തി വിലയിരുത്താന് മന്ത്രി നിര്ദേശം നല്കിയിട്ടുണ്ട്.
ഇതാനുസരിച്ച് വേണ്ട മാറ്റങ്ങളോടെയാകും ഇത്തവണ ഓണ്ലൈന് ക്ലാസുകള് ഒരുക്കുക. ഡിജിറ്റല് ക്ലാസുകളുടെ ഗുണഫലം ലഭിക്കാത്ത വിദ്യാര്ഥികളുണ്ടെങ്കില് കണ്ടെത്തി പരിഹാര നടപടികള് സ്വീകരിക്കണമെന്നും മന്ത്രി നിര്ദേശം നല്കി.
ജൂണ് ഒന്നിന് തന്നെ വിക്ടേഴ്സ് ചാനല് വഴി ക്ലാസുകള് സംപ്രേഷണം ചെയ്യാന് കൈറ്റ് ഒരുക്കം ആരംഭിച്ചു. ആദ്യഘട്ടത്തില് പത്ത്, 12 ക്ലാസുകളിലെ വിദ്യാര്ഥികള്ക്ക് വിക്ടേഴ്സിലെ ക്ലാസിന് പുറമെ സ്കൂള്തലത്തില് ബന്ധപ്പെട്ട അധ്യാപകര്
ഒാണ്ലൈന് ക്ലാസ് നടത്തണമെന്ന നിര്ദേശവും കൈറ്റ് സര്ക്കാറിന് മുന്നില് സമര്പ്പിച്ചിട്ടുണ്ട്. സംസ്ഥാനത്ത് ഒന്പതാം ക്ലാസ് വരെയുള്ള മുഴുവന് വിദ്യാര്ത്ഥികള്ക്കും ക്ലാസ് കയറ്റം നല്കാന് നിര്ദ്ദേശിച്ച് സര്ക്കാര് ഉത്തരവിറക്കിയിരുന്നു.
ഒന്ന് മുതല് 8 വരെയുള്ള ക്ലാസുകളിലെ വിദ്യാര്ഥികള്ക്ക് വിദ്യാഭ്യാസ അവകാശ നിയമപ്രകാരവും 9-ാം ക്ലാസിലെ വിദ്യാര്ഥികള്ക്ക് നിലവിലെ അസാധാരണ സാഹചര്യം പരിഗണിച്ചുമാണ് ക്ലാസ് കയറ്റം നല്കുക.