NEWS 22 TRUTH . EQUALITY . FRATERNITY
Related Articles
മസ്കത്ത്: റിയാലിന്‍റെ വിനിമയ നിരക്ക് വെള്ളിയാഴ്ച ഒരു മാസത്തിനിടയിലെ ഏറ്റവും താഴ്ന്ന നിലയിൽ. ഒമാനിലെ വിനിമയ സ്ഥാപനങ്ങൾ വെള്ളിയാഴ്ച റിയാലിന് 212.40 രൂപ നിരക്കാണ് നൽകിയത്. വ്യാഴാഴ്ച റിയാലിന് 214.40 രൂപയായിരുന്നു ക്ലോസിംഗ് നിരക്ക്. ഒറ്റ ദിവസം കൊണ്ട് റിയാലിന് രണ്ട് രൂപയാണ് കുറഞ്ഞത്. വ്യാഴാഴ്ച രാവിലെ റിയാലിന് 214.70 രൂപ വരെ നൽകി. മാസത്തിന്‍റെ തുടക്കത്തിൽ വിനിമയ നിരക്കിലുണ്ടായ ഇടിവ് പ്രവാസികൾക്ക് തിരിച്ചടിയായിട്ടുണ്ട്. ശമ്പളം ലഭിച്ച് നാട്ടിലേക്ക് പണം അയയ്ക്കാൻ പ്രവാസികൾ കാത്തിരിക്കുന്ന സമയമാണിത്. നിരക്കിലെ പെട്ടെന്നുള്ള ഇടിവ് ഉയർന്ന നിരക്കിൽ പണം അയയ്ക്കാൻ കാത്തിരുന്നവർക്കും ബുദ്ധിമുട്ടുണ്ടാക്കുന്നു.
വിനിമയ നിരക്ക് കുറയാൻ കാരണം ഇന്ത്യൻ രൂപ ഡോളറിനേക്കാൾ മെച്ചപ്പെട്ടതിനാലാണ്. 81.97 രൂപയിലാണ് വെള്ളിയാഴ്ച ഡോളർ വിനിമയം നടന്നത്. കഴിഞ്ഞ ദിവസത്തേക്കാൾ 63 പൈസ കുറവാണിത്. വ്യാഴാഴ്ച ഡോളർ 82.60 രൂപയിലായിരുന്നു. ഇന്ത്യയിലേക്കുള്ള വിദേശ നിക്ഷേപകരുടെ ഒഴുക്കും ആഭ്യന്തര ഉൽപാദന മേഖലയിലെ അനുകൂല ഘടകവുമാണ് ഇന്ത്യൻ രൂപ ശക്തിപ്പെടാനുള്ള പ്രധാന കാരണം. ഫോറിൻ ഇന്‍സ്റ്റിറ്റ്യൂഷനൽ ഇൻവെസ്റ്റേഴ്സ് വ്യാഴാഴ്ച മാത്രം ഇന്ത്യയിൽ 12,770.81 കോടി രൂപ നിക്ഷേപിച്ചു. അവരാണ് ഇന്ത്യൻ ഓഹരി വിപണിയെ നിയന്ത്രിക്കുന്നത്.
യൂറോപ്യൻ രാജ്യങ്ങളുടെ കറൻസിയായ യൂറോയും ഇടിവ് നേരിടുകയാണ്. യൂറോപ്യൻ രാജ്യങ്ങൾ അനുഭവിക്കാൻ സാധ്യതയുള്ള പണപ്പെരുപ്പ ഭീഷണി യൂറോയെ പ്രതികൂലമായി ബാധിക്കുന്നു. എന്നിരുന്നാലും, ചൈന പൂർവ്വസ്ഥിതിയിൽ എത്തിയതിനാൽ ആഗോള വിപണിയിൽ എണ്ണ വില ഉയരാൻ തുടങ്ങി. ഒരാഴ്ചയിലെ ഏറ്റവും ഉയർന്ന നിരക്കാണ് വെള്ളിയാഴ്ച വിപണി രേഖപ്പെടുത്തിയത്. എണ്ണവില ഉയരുന്നതും യുഎസ് ഡോളർ ശക്തിപ്പെടുന്നതും ഇന്ത്യൻ രൂപയെ പ്രതികൂലമായി ബാധിക്കുമെന്ന് പ്രതീക്ഷിക്കുന്നു. അതിനാൽ വരും ദിവസങ്ങളിൽ വിനിമയ നിരക്ക് ഉയരാൻ സാധ്യതയുണ്ട്. പണപ്പെരുപ്പം കൂടിയാൽ എണ്ണവിലയും കുറയാൻ സാധ്യതയുണ്ട്.
