നെടുമ്ബാശ്ശേരി വിമാനത്താവളത്തില് ജോലി വാഗ്ദാനം ചെയ്ത് ലക്ഷങ്ങള് തട്ടിയ കേസില് മലപ്പുറം പൊലീസ് ഒരാളെ അറസ്റ്റ് ചെയ്തു. യുവാക്കളെ ജോലി വാഗ്ദാനം നല്കുന്ന തട്ടിപ്പ്
സംഘവുമായി ബന്ധപ്പെടുത്തിയ മലപ്പുറം ചെമ്മങ്കടവ് സ്വദേശി രവീന്ദ്രനാണ് (58) അറസ്റ്റിലായത്. രണ്ട് മുതല് എട്ടുലക്ഷം രൂപ വരെയാണ് ഒരാളില്നിന്ന് സംഘം തട്ടിയെടുത്തത്. വിമാനത്താവളത്തിന്റെ വ്യാജ ലെറ്റര് പാഡും സീലും ഉള്പ്പെടെ നിര്മിച്ച ഇവര്
ഇല്ലാത്ത തസ്തികകളിലേക്ക് നേരിട്ട് നിയമനമെന്ന് പറഞ്ഞാണ് തട്ടിപ്പ് നടത്തിയിരുന്നത്. പ്രമുഖ വ്യവസായിയുടെ ബന്ധുവെന്ന് പരിചയപ്പെടുത്തിയാണ് യുവാക്കളെ കെണിയില് വീഴ്ത്തിയത്. അഞ്ച് ലക്ഷം രൂപ നഷ്ടമായ മലപ്പുറം
സ്വദേശി പൊലീസിന് പരാതി നല്കിയിരുന്നു. നിരവധി തവണ വിമാനത്താവളത്തില് എത്താന് ഉദ്യോഗാര്ഥികളോട് നിര്ദേശിച്ചിരുന്നു. അവിടെ എത്തുമ്പോള് സാങ്കേതിക കാരണങ്ങള് പറഞ്ഞ് മടക്കിയയക്കുകയാണ് പതിവ്.
ആദ്യം ഒരു ലക്ഷവും പിന്നീട് ബാക്കി തുകയും ആവശ്യപ്പെടുകയായിരുന്നു. ജോലി ലഭിക്കാത്തതിനെ തുടര്ന്നാണ് പരാതി നല്കിയത്. തൃശൂര്, എറണാകുളം ജില്ലകളില്നിന്നുള്ളവര്
ഉള്പ്പെടെ തട്ടിപ്പിനിരയായതിനാല് അന്വേഷണം ഊര്ജിതമാക്കിയിരിക്കുകയാണെന്ന് സ്റ്റേഷന് ഹൗസ് ഓഫിസര് ജോബി തോമസ് അറിയിച്ചു