ടി20 ലോകകപ്പിനുള്ള ഇന്ത്യന് ക്രിക്കറ്റ് ടീമിനെ ബിസിസിഐ ഇന്നലെ പ്രഖ്യാപിച്ചെങ്കിലും രാജ്യത്ത് ഇപ്പോള് ഏറ്റവും വലിയ ചര്ച്ചാവിഷയം മുന് ഇന്ത്യന് നായകന് എംഎസ് ധോണിയാണ്. പരിമിത ഓവര് ലോകകപ്പില് ടീമിന്റെ ഉപദേഷ്ടാവായുള്ള ധോണിയുടെ വരവ് ആവേശത്തോടെയാണ് ക്രിക്കറ്റ് പ്രേമികള് ഏറ്റെടുത്തിരിക്കുന്നത്.
എന്നാല്, ധോണിയെ ഉപദേഷ്ടാവായി നിയമിച്ചതിനെതിരെ ബിസിസിഐക്ക് ഇന്ന് പരാതി ലഭിച്ചതായാണ് ഏറ്റവും പുതിയ റിപ്പോര്ട്ട്. ലോധ കമ്മിറ്റി പരിഷ്കാരത്തിലെ താല്പ്പര്യ നിബന്ധനകള് മുന്നിര്ത്തിയാണ് പരാതി. മുന് മധ്യപ്രദേശ് ക്രിക്കറ്റ് അസോസിയേഷന് ലൈഫ് അംഗം സഞ്ജീവ് ഗുപ്തയാണ് കൗണ്സില് അംഗങ്ങള്ക്ക് അതുമായി ബന്ധപ്പെട്ട് കത്ത് അയച്ചത്.
ഐപിഎല് ഫ്രാഞ്ചൈസി ചെന്നൈ സൂപ്പര് കിംഗ്സിന്റെ (സിഎസ്കെ) ക്യാപ്റ്റനായ ധോണി ഇന്ത്യന് ടീമിന്റെ ഉപദേഷ്ടാവായി സ്ഥാനമേല്ക്കുന്നത് ലോധ കമ്മിറ്റി ശുപാര്ശകളുടെ ലംഘനമാണെന്നും ഒരാള്ക്ക് ഒരേസമയം, രണ്ട് തസ്തികകളിലിരിക്കാന് കഴിയില്ലെന്നുമാണ് അദ്ദേഹം ചൂണ്ടിക്കാട്ടിയത്.
“അതെ, സൗരവ് (ഗാംഗുലി), ജയ് (ഷാ) എന്നിവരുള്പ്പെടെയുള്ള ഉന്നത കൗണ്സില് അംഗങ്ങള്ക്ക് ഗുപ്ത കത്തയച്ചിട്ടുണ്ട്. ബിസിസിഐ ഭരണഘടനയുടെ 38 (4) വകുപ്പ് അദ്ദേഹം ഉദ്ധരിച്ചിട്ടുണ്ട്, അതുപ്രകാരം ഒരാള്ക്ക് രണ്ട് വ്യത്യസ്ത പദവികള് വഹിക്കാന് കഴിയില്ല. ഇതുമായി ബന്ധപ്പെട്ട കാര്യങ്ങള് പരിശോധിക്കാന് കൗണ്സില് അതിന്റെ നിയമസംഘവുമായി കൂടിയാലോചിക്കേണ്ടതുണ്ട്,” -ബിസിസിഐയുടെ പ്രതിനിധി പിടിഐയോട് പറഞ്ഞു.