NEWS 22 TRUTH . EQUALITY . FRATERNITY
Related Articles
കഞ്ചാവ് വില്‍പനക്കാരെ പിടികൂടാനെത്തിയ എക്സൈസ് സംഘത്തിന് നേരേയുണ്ടായ ആക്രമണത്തില്‍ എക്സൈസ് ഉദ്യോഗസ്ഥന് പരിക്കേറ്റു. സംഘത്തില്‍പെട്ട ഒരാളെ കഞ്ചാവുമായി പിടികൂടി. കുത്തിപ്പരിക്കേല്‍പിച്ച ശേഷം ഉദ്യോഗസ്ഥന്റെ മൊബൈലുമായാണ് അക്രമി കടന്നത്. ഇയാള്‍ക്കായി ഇരവിപുരം പൊലീസും, എക്സൈസും തിരച്ചില്‍ ആരംഭിച്ചു.
ഞായറാഴ്ച ഉച്ചക്ക് കൂട്ടിക്കട ജങ്ഷന് കിഴക്ക് ആലുംമൂട് റോഡിലെ കലുങ്ങിനടുത്തായിരുന്നു സംഭവം. ഇവിടം കേന്ദ്രീകരിച്ച്‌ വന്‍തോതില്‍ കഞ്ചാവ് വ്യാപാരം നടക്കുന്നുവെന്ന വിവരത്തിന്റെ അടിസ്ഥാനത്തില്‍ എത്തി പിടികൂടാന്‍ ശ്രമിക്കുന്നതിനിടെയായിരുന്നു ആക്രമണം. സംഭവമറിഞ്ഞ് ചാത്തന്നൂര്‍ എക്സൈസ് ഓഫിസില്‍ നിന്നും ഉദ്യോഗസ്ഥരെത്തിയാണ് ഒരാളെ പിടികൂടിയത്.
മുഖത്തും ശരീരത്തിന്റെ വിവിധ ഭാഗങ്ങളിലും പരിക്കേറ്റ സിവില്‍ എക്സൈസ് ഓഫിസറെ കൊട്ടിയം ഹോളിക്രോസ് ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചു. അസി.എക്സൈസ് കമീഷണര്‍ അടക്കമുള്ള ഉദ്യോഗസ്ഥര്‍ ആശുപത്രിയിലെത്തി വിവരശേഖരണം നടത്തി.
ചാത്തന്നൂര്‍ എക്സൈസ് ഓഫിസിലെ സിവില്‍ എക്സൈസ് ഓഫിസര്‍ രാഹുല്‍ ആര്‍. രാജിനാണ് പരിക്കേറ്റതെന്നാണ് വിവരം. കഞ്ചാവുമായി പിടിയിലായിട്ടുള്ളയാള്‍ കഞ്ചാവ് മൊത്തവ്യാപാരം നടത്തുന്ന സംഘത്തിലെ കണ്ണിയാണെന്നാണറിയുന്നത്.
