പരാതി കിട്ടി 24 മണിക്കൂറിനകം വ്യാജ അക്കൗണ്ടുകള് നീക്കം ചെയ്യണമെന്ന് കേന്ദ്ര സര്ക്കാര് സമൂഹമാധ്യമങ്ങളായ ട്വിറ്റര്, ഫേസ്ബുക്ക്, ഇന്സ്റ്റഗ്രാം, യൂട്യൂബ് എന്നിവക്ക് നിര്ദേശം നല്കി. പുതിയ ഐ.ടി നയത്തിന്റെ ഭാഗമായാണ് സര്ക്കാര് നിര്ദേശം.
പ്രശസ്തരായവരുടെയും അല്ലാത്തവരുടെയും പേരിലെ വ്യാജ അക്കൗണ്ടുകള് വ്യാപകമാണ്. സ്വയം പ്രശസ്തരാവാനാണ് ചിലര് വ്യാജ പ്രൊഫൈല് സൃഷ്ടിക്കുന്നത്. ഇതിന്റെ പേരില് സമൂഹമാധ്യമ അനുയായികളുടെ എണ്ണം കൂട്ടുകയാണ് ലക്ഷ്യം.
സെലിബ്രിറ്റികളുടെ വിശ്വാസ്യത ചൂഷണം ചെയ്ത് തട്ടിപ്പ് നടത്തുകയാണ് മറ്റു ചിലരുടെ ലക്ഷ്യം. സൈബര് ആക്രമണങ്ങള്ക്കുവേണ്ടി വ്യാജ പ്രൊഫൈല് ഉണ്ടാക്കുന്നവരുമുണ്ട്. വ്യാജ അക്കൗണ്ടുകള് ലോക വ്യാപകമാണ്.
അശ്ലീലത, നഗ്നത പ്രദര്ശനം, ലൈംഗിക ചേഷ്ടകള് എന്നിവ സംബന്ധിച്ച പരാതി ലഭിച്ചാലും നടപടി സ്വീകരിക്കണമെന്ന് സമൂഹമാധ്യമങ്ങളോട് സര്ക്കാര് ആവശ്യപ്പെട്ടു. ചിത്രങ്ങള് മോര്ഫ്
ചെയ്തും അല്ലാതെയും വ്യാജ അക്കൗണ്ടുകളുണ്ടാക്കുന്നുണ്ട്. അക്കൗണ്ടുകളുടെ ആധികാരികത ഉറപ്പുവരുത്തുന്നതിനാണ് ബ്ലൂ ടിക് നല്കുന്നത്. എന്നാലിത് ചില സെലിബ്രിറ്റികള്ക്ക് മാത്രമാണ് നല്കുന്നത്.