കൊയിലാണ്ടി: മേഖലയില് കടല്വെള്ളത്തിനു പച്ച നിറം ദൃശ്യമായതിനു പിന്നാലെ കടല് മത്സ്യങ്ങള് കൂട്ടത്തോടെ ചത്തുപൊങ്ങി. മത്സ്യങ്ങള്, കടലാമ, കടലിലെ പാറക്കെട്ടുകളിലും മറ്റും താമസിക്കുന്ന ഉടുമ്ബുകള് ഉള്പ്പെടെയുള്ളവയാണ് വ്യാഴാഴ്ച ചത്തു പൊങ്ങിയത്. ബുധനാഴ്ചയാണ് മേഖലയില് കടല്വെള്ളത്തിനു കടുംപച്ചനിറം കാണപ്പെട്ടത്. കുഴമ്ബുരൂപത്തിലുള്ള വെള്ളമാണ് ഈ ഭാഗത്തുള്ളത്.
ആദ്യമായാണ് മേഖലയില് ഇത്തരമൊരു സംഭവം. കേരളത്തില് മറ്റു ചില ഭാഗങ്ങളില് ഈ പ്രതിഭാസം നേരത്തെയുണ്ടായിരുന്നു. നേരത്തെ കാസര്കോട് തീരത്തും കൊച്ചിയിലും ആലപ്പുഴയിലുമെല്ലാം സമാനമായ പ്രതിഭാസം ശ്രദ്ധയില്പ്പെട്ടിരുന്നു. കാലാവസ്ഥ വ്യതിയാനത്തിനൊപ്പം കടലിലെ ആവാസവ്യവസ്ഥ താളംതെറ്റുന്നതാണ് കടല് പച്ചനിറത്തിലേക്ക്
വഴിമാറാന് കാരണമെന്നാണ് കുസാറ്റ് മറൈന് ബയോളജി വിഭാഗം മേധാവി ഡോ. ബിജോയ് നന്ദന് അഭിപ്രായപ്പെട്ടു. മീനുകള് കൂട്ടത്തോടെ ചത്തതിനു പിന്നില് കടലിലെ വിഷപദാര്ഥങ്ങളാകാമെന്ന് അനുമാനം. പ്ലവക ജീവികളുടെ വന് വര്ധനയാണ് കടല്വെള്ളത്തിന്റെ നിറം മാറ്റത്തിനു പിന്നില്. പ്ലവക ജീവികളുടെ വര്ധനവിനു ബ്ലൂമിങ് എന്നാണു പറയുക. ഇവ പലപ്പോഴും വിഷപദാര്ഥങ്ങള് ഉല്പാദിപ്പിക്കും.