NEWS 22 TRUTH . EQUALITY . FRATERNITY
Related Articles
കാല്‍ ഡോര്‍ അഗ്നിബാധയെ തുടര്‍ന്ന് കാലിഫോര്‍ണിയയിലെ താഹോ തടാകത്തിന് സമീപം നിര്‍ബന്ധിത ഒഴിപ്പിക്കല്‍ നടത്തിയതോടെ തെരുവുകള്‍ കയ്യേറി കരടികള്‍. തീ പടര്‍ന്നതോടെ 22,000 പേരെയാണ് പ്രദേശത്തു നിന്ന് ഒഴിപ്പിച്ചത്. തെരുവുകള്‍ വിജനമായതോടെ ഇവിടം സമ്ബൂര്‍ണ ആധിപത്യം നടത്തുകയായിരുന്നു കരടികള്‍.
ആളുകളെ ഒഴിപ്പിച്ചതോടെ മാലിന്യ കുട്ടകള്‍ തേടിയും വീടുകളില്‍ ഭക്ഷണം തേടിയുമെത്തുകയായിരുന്നു ഇവ. അഗ്നി പടര്‍ന്നതോടെ ഇവയുടെ ആവാസകേന്ദ്രം നഷ്ടമായതോടെയാണ് ഇവ കാടുവിട്ട് പുറത്തിറങ്ങിയതെന്ന് അധികൃതര്‍ ചൂണ്ടിക്കാട്ടുന്നു. എന്നാല്‍ കാട്ടുതീ ശമിച്ചതോടെ പലരും സ്വന്തം വീടുകളിലേക്ക് മടങ്ങി.
വീടുകളിലും റോഡിലും നഗരത്തിന്‍റെ പല ഭാഗങ്ങളിലും കരടികളെ കണ്ടതായി പ്രദേശവാസികള്‍ അധികൃതരെ അറിയിക്കുകയായിരുന്നു. മാലിന്യക്കുട്ടകളെല്ലാം കരടികള്‍ നശിപ്പിച്ചതോടെ. മാലിന്യം ഇടുന്നതിനായി താല്‍കാലിക സംവിധാനം ഒരുക്കാനൊരുങ്ങുകയാണ് അധികൃതര്‍. ഭക്ഷണം തേടിയാണ് ഇവയുടെ നഗരങ്ങളിലേക്കുള്ള സഞ്ചാരം.
മനുഷ്യരെയോ വാഹനങ്ങളെയോ ഇവക്ക് പേടിയില്ലെന്നും പ്രദേശവാസികള്‍ പറയുന്നു. വിനോദസഞ്ചാരികളുടെ ഒഴുക്കുള്ള കാലിഫോര്‍ണിയ – നെവാഡാ അതിര്‍ത്തിയിലെ താഹോ തടാകത്തിന് സമീപമാണ് വന്‍ തീപിടിത്തമുണ്ടായത്. തടാകത്തിന്‍റെ തെക്കുഭാഗത്തെ നഗരത്തില്‍നിന്ന് പൂര്‍ണമായും ജനങ്ങളെ ഒഴിപ്പിച്ചിരുന്നു. 776 വീടുകളും കെട്ടിടങ്ങളുമാണ് കാല്‍ഡോര്‍ അഗ്നി വിഴുങ്ങിയത്. തീ നിയന്ത്രണ വിധേയമാക്കുന്നതിനായി ആയിരക്കണക്കിന് അഗ്നിരക്ഷ സേന ജീവനക്കാരെയാണ് പ്രദേശത്ത് വിന്യസിച്ചിരുന്നത്.
